26 سنة وانا عاقر حتى تزوج عليا وقع المستحيل 😱 القصة لي صدمات الجميع
السلام عليكم، اليوم جيت نعاود ليكم قصتي اللي غادي تاخدو منها العبرة وغادي تكون بالنسبة ليكم درس، وبالخصوص كاع العيالات اللي حرمهم ربي من الدراري واللي كتعاني من تأخر الحمل.
تزوجت وعندي 20 عام، راجلي كان كبر مني بـ 5 سنين، وكان هو الزوج المثالي، الطيب والحنون. داز الشهر الأول والثاني والثالث وما كاين والو. راجلي كان كيموت على الدراري، وكل شهر كان كيصبرني ويقول ليا: "معليش، الشهر الجاي يكون خير".
دازت شهور ومبان والو، مشينا للطبيبة وقالت ليا عندي "ضعف التبويض". بديت كنشرب الدوايات والتحاميل ولكن والو. دازت عام، عامين، خمس سنين... ما خليت حتى طبيب ولا عُشابة، والو.
ملي كملنا 11 عام ديال الزواج، سافرنا لواحد البلاد باش نتعالجوا، وقالوا ليا عندي انسداد في الأنابيب وخصني عملية. درتها ورجعت لبلادي كنتسنى الفرج، ولكن ربي ما بغاش. راجلي كان كيبقى يصبرني ويقول ليا: "أنا باغي غير تكوني هانية ومزيانة معايا". كنت كنقول ليه تزوج، كان كيقول ليا: "إلى جابهم الله مرحبا، وإلى ما جابهمش، أنت بوحدك عندي بالدنيا".
ملي كملنا 17 عام ديال الزواج، مرضت بالسكر وعندي 36 عام. هنا فقدت الأمل، حيت الناس كانوا كيقولوا لي اللي فيها السكر ما عمرها تولد، وإلى ولدت غيجي الدري معوق. دازت 21 عام ديال الزواج وحنا باقين بلا ولاد.
بنينا فيلا كبيرة، وكنا كارين الطبقة الثانية لواحد الجيران عندهم 4 ديال الوليدات. كنت كنبقى غير نسمع ليهم ونبكي، كنتسناهم غير يدقوا عليا نلعب معاهم.
ملي كملنا 25 عام ديال الزواج، وعندي 44 عام، العائلة ديال راجلي بداو كيلمحو ليه باللي خصو يتزوج حيت أنا كبرت وما غاداش نولد. واحد الصيف، مشى راجلي عند عائلتو وبقيت أنا في الدار بوحدي. تعطل عليا، وملي رجع، بان ليا وجهو ماشي هو هذاك.
قال ليا: "أنا ما نقدرش نخبي عليك، أنا مشيت عند والدي وزوجوني بنت عندها 26 عام وجبتها معايا". تهرست بالبكا، حيت كان ديما كيقول ليا "أنت عندي بالدنيا". قال ليا: "شوفي يا رحمة، أنا راه درت غير الحلال".
بدات حياتي كحالت، ليلة عندي وليلة عندها. ومن بعد شهرين، سمعت باللي العروسة الجديدة حمالت. راجلي كان طار بالفرحة، وأنا قلبي كيتقطع. ولدات ولد وسماه عبد الله. كنت كنسمع البكا ديالو الفوق وقلبي كيتشرح، ولكن ما كنتش كنبغي نشوفو باش ما نتعلقش بيه.
من بعد، حملات بالثاني، وهكا قررت نتفارق معاه. طلبت الطلاق ورجعت لدارنا من بعد 26 عام ديال الزواج بلا ولاد. لقيت الوالدة ديالي مريضة بزاف بتصفية الكلي، جلست معاها 7 شهور وتوفات ربي يرحمها.
بقيت وحيدة، لا أب لا أم لا زوج لا ولاد، وعندي 46 عام. من بعد عام، خطبني واحد الراجل عندو 64 عام، ماتت مرتو وخلاوه ولادو بوحدو. ترددت في الأول، ولكن ملي درت صلاة الاستخارة، وافقت. قلت نكسب فيه الأجر ونونسو ويونسني.
تزوجنا، وكان في قلبي حزن كبير باللي غادة نموت بلا ولاد. راجلي كان مريض بالسكر والضغط، وأنا كذلك. واحد النهار، بدات كتجيني شي أوجاع غريبة في ظهري وصدرى. قلت يمكن شي مرض خايب. صبرت جوج سمانات ومشيت عند الطبيبة.
قالت ليا يمكن غير السن ديال اليأس، ولكن طلبت مني ندير تحليلة دم. السيدة اللي خدات مني الدم سولاتني: "واش أنت حاملة؟". قلت ليها بكل برود: "لا".
ملي رجعت عند الطبيبة، قالت ليا بكل فرح: "مبروك يا رحمة، أنت حاملة!". ما صدقتش، بقيت غير كنبكي. راجلي حتى هو طار بالفرحة وقال ليا: "شفتي يا رحمة؟ ربي رحمك وعوضك".
بديت كنتبع الدوا ديال السكر والانسولين، وملي سمعت دقات قلب الجنين، تمنيت لو كانت الوالدة ديالي حية تشوف هاد النهار. في الشهر الرابع، بدات كرشي كتكبر وبديت كنحس بالحركة. شريت حوايج التربية اللي كنت كنحلم بيهم حياتي كاملة.
وفي يوم 22/08/1428 هجرية، ولدت ولدي "سلطان". ربي عوضني على صبري وعلى السنوات اللي ضاعت. ربي ارحمني رحمتي لهاد الراجل الشايب اللي وافقت عليه وهو مريض.
هادي قصتي باش تعرفوا باللي رحمة الله واسعة، وما تقنطوش من روح الله. الرزق كيجي ملي كيبغي الله، لا ضعف تبويض لا والو يوقف قدام قدرة الله. ولدي دابا عندو عام وشهرين، وراجلي عندو 65 عام، وأنا عندي 48 عام. الحمد لله على كل حال.
للمزيد يمكنكم مشاهدة الفيديو علاه
مرحبا بتعليقاتكم وارائكم على موقع اسمع حكايتي سعداء بالاجابة عليها.